Excelin 2007 versiyasından sonra “Cədvəl” (Table) xüsusiyyətini təqdim etdi. “Cədvəl”-lərin köməkliyi ilə məlumatlarımız strukturlaşdırılır, qruplaşdırılır və onları analız etmək daha asan olur. İstifadəsi və yaradılması çox asan olmaqla bərabər, əməliyyatlarda çox üstünlüklər verir. Bəzi üstünlükləri:

1. Yeni məlumatlar daxil edildikçə “Cədvəl” genişliyir və yaradılan funksiya, pivot və qrafiklərdə diapazonları yeniləməyə ehtiyac qalmır.
2. Funksiya daxil edildikdə digər sətrlərə də aid edilir.
3. Xanalara aid edilən formatlar (tarix və ya rəqəm formatları) yeni əlavə olunan digər sətrlərə də tətbiq olunur
4. Hər bir cədvəlin (sütun, sətr) öz adı olması səbəbi ilə onlara referans vermək daha asandır. və s.

“Cədvəl”-in yaradılması

“Cədvəl” yaratmaq üçün məlumatlarımızın olduğu hər hansı xananı seçdikdən (aktivləşdirdikdən) sonra Insert ⇒ Tables ⇒ Table klikləyirik. Qısa yolu isə Ctrl+T.

“Create table” (Cədvəli Yarat) menüsü gəldiyində, bir çox hallarda “My table has headers” (cədvəlimin başlıqları var) seçilmiş olur. Əgər hər hansı başlıq adı boşdursa o zaman həmin sətr seçilməmiş ola bilər. Əgər Excel məlumat bazasını düzgün təxmin etməyibsə diapazonu dəqiqləşdirib daha sonra OK düyməsini klikləmək lazımdır. Cədvəl yaradıldıqdan sonra diapazonları dəyişdirmək istəyirsinizsə Table Tools ⇒ Properties ⇒ Resize Table hissəsində dəyişə bilərsiniz.

“Cədvəl” yaratmamışdan qabaq bəzi nüanslara fikir vermək lazımdır

1. Bütün başlıqlarımızın düzgün şəkildə qeyd edilməlidir. Əks halda Excel başlıqları düzgün yaratmaya bilər. Əgər başlıqda boş xana varsa o zaman “Column1” (2.3….) şəklində ad təyin olunacaq.
2. Başlıqların hamısı fərqli adlarda olmalıdır. Eyni olan başlıqlar dəyişdiriləcək. Misal üçün, əgər iki ədəd “AZN” sütunu varsa o zaman digər sütun “AZN2” şəklində dəyişdiriləcək.
3. Sütun adları rəqəmi qəbul etmir. Əgər ayları göstərmək məqsədi ilə başlıqlara 1-2-3-və.s şəklində rəqəmlər yazmısınızsa, həmin rəqəmlərin hamısı mətn formatına çevriləcək.
4. Sadəcə bir başlıq ola bilər. Digər cədvəllərdə yazdığınız kimi il və ayları ayrı başlıqlarda göstərmək “Cədvəl”-lərdə mümkün deyil.

OK düyməsini kliklədikdən sonra artıq bizim yeni strukturlaşmış cədvəlimiz yaranmış olur. “Cədvəl”in yaranması ilə bərabər bizim artıq yeni menümüz və yeni diapazon adlarımız yaranır. Cədvəlin hərhansı xanasını seçdikdə, şəkildəki kimi menu aktivləşir.

Cədvəl yaradıldıqdan sonra avtomatik olaraq rənglənərək format təyin olunur. Əgər formatı dəyişdirmək istəyirsinizsə, Table Tools ⇒ Design ⇒ Table Styles klikləyərək şəkildəki kimi təqdim olunan müxtəlif formatlardan istədiyinizi seçə bilərsiniz. Əgər heç bir formatlamanın olmamasını istəyirsinizsə eyni menünün aşağısındakı “Clear” düyməsini klikliyə bilərsiniz.

Cədvəldə başlıqların olmamasını istıyirisinizsə, Table Tools ⇒ Table Style Options ⇒ Header Row (seçilmə işarəsi ləğv olunur). Bu zaman cədvəldəki filterlərdə silinəcək. Eyni cədvələ yenidən filter tətbiq olunduğunda isə yenidən başlıqları aktivləşdirəcək.

Cədvəllərin digər xüsusiyyəti isə, başlıqların hər zaman görsənməsidir. Belə ki. əgər səhifə boyunca aşağı gedirsinizsə başlıqlar sütun adlarını əvəz edərək görünmüş olacaq.

Əgər sütun adlarının dəyişməməsini ve yenədə başlıqların görsənməsini istəyisinizsə View ⇒ Freeze Panes ⇒ Freeze Top Row seçimindən istifadə edə bilərsiniz.

Cədvəlləri yenidən diapazona qaytarmaq üçün Table Tools ⇒ Tools ⇒ Convert to Range seçirsiniz. Seçimdən sonra şəkildəki kimi xəbardarlıq çıxaraq “Cədvəlin normal diapazona qaytarmaq istədiyinizi” soruşur. “Yes” kliklədikdən sonra “Cədvəl”-lərdə olan bütün xüsusiyyətlər itərək normal diapazonda işləməyə başlayırsınız. Bu zaman cədvəldə olan rəngləmələr silinmir. Rəngləmələri ləğv etmək üçün, diapazona çevirməmişdən qabaq üst tərəfdə qeyd olunan “Clear” düyməsini klikliyə və ya Home ⇒ Editing ⇒ Clear ⇒ Clear Formats menüsündən bütün formatlamanı silə bilərsiniz.

Cədvəllərdə filterin tətbiq olunması

Cədvəl yaradılan zaman avtomatik “Filter” başlıqları qoyulur. Əgər cədvəldən filteri ləğv etmək istəyirisinizsə, Table Tools ⇒ Table Style Options ⇒ Filter Button (seçilmə işarəsi ləğv olunur) və ya cədvəldəki hər hansı xana seçilir və Home ⇒ Editing ⇒ Sort and Filter ⇒ Filter işarəsi deaktiv olunur.

Normal hallarda, bir səhifədə ancaq bir filter yaratmaq olur. Ancaq əgər bir səhifədə bir neçə cədvəliniz olarsa bütün cədvəllərdə filterdən istifadə edə bilərsiniz. Bu şəkildə, eyni səhifədə bir neçə filter tətbiq olunmuş cədvəllər yaratmaq olur. Ancaq, hərhansı cədvələ filter tətbiq olunduğu zaman bütün sətr gizləndiyi üçün eyni səhifədə olan digər cədvəl məlumatları da gizlənmiş olacaq.

Hansı sütuna filter tətbiq olunubsa, həmin sütunun filteri şəkildəki kimi digərlərindən fərqlənir.

Slicer (Məhdudlaşdırıcı) ilə filter tətbiqi

Cədvəllərdə digər filterləmə metodu “slicer” (məhdudlaşdırıcı) istifadəsidir. Standart filterə nəzərən daha az elastikdir. Ayrıca ekranda daha çox yer tutur. Ancaq, görüntü olaraq daha cəzbedicidir və hansı filterlərin tətbiq olunduğunu ekrandan da görmək mümkündür. Aktivləşdirmək üçün Table tools ⇒ Tools ⇒ Insert Slicer düyməsini klikləyirsiniz.

Bu zaman şəkildəki kimi siyahı çıxacaqdır (Insert Slicers). Həmin siyahı, cədvəlimizdə olan bütün başlıq adlarımızdır. Filter tətbiq etmək istədiyimiz başlıqları seçib OK klikləyirik.

Seçimizdən asılı olaraq Excel məhdudlaşdrıcı (slicer) yaradacaq və həmin pəncərədə sütunlarda olan məlumatlar təkrarlanmadan sıralanacaq. Bir neçə seçim etmək üçün yaşıl dairədə göstərilən düymə aktivləşdirilir. Bütün filteri ləğv etmək üçün isə qırmızı dairədə göstərilən filter təmizlə düyməsi kliklənir.